አልወለድም

ይህ መጽሐፍ የዛሬ 01 ዓመት ገደማ በደንቡ ምርመራ አልፎ ታትሞ በወጣ ጊዜ ታላቅ ችግር ፈጥሮብኝ ነበር ። ከአንድ ዓመት በላይ ሲያጨቃጭቀኝና በየቦታው ሲያስጎትተኝ ቆይቶ በመጨረሻው በእሳት ነዶ የሰማዕትነት ጽዋውን እስከተቀበለበት ቀን ድረስ ብዙ የክርክር መልሶች እንድጽፍለት አስገድዶኛል። በፖሊስ አሳስሮኛል። ብዙ ጠላቶችም አፍርቶልኛል ። ይህ በመሆኑ አንዳንድ ሰዎች ይህን ከመጽሐፎቼ ውስጥ በመታተም ተራ ስድስተኛ የሆነ ጽሑፌን የመጀመሪያ መጽሐፌ አድርገው ሲናገሩ ከመንግሥት ጋር የነበረኝን ከፍተኛ ችግር ሁሉ ከዚሁ ጋር ሊያያይዙት ሲሞክሩ እሰማለሁ ። ነገር ግን « አልወለድም » ከፍ ብዬ የጠቀሴቸውን የራሱ ችግሮች ቢያስከትልብኝም የዚያ ሁሉ ችግሬ ምክንያት እርሱ ብቻ አይደለም ። ኢትዮጵያን አሁን ካለችበት ከባድ ችግር ያደረሳት እጅግ የተበላሸ አስተዳደር ቀደም ብሎ ከተሰማቸው ሰዎች አንዱ ስለነበርሁ አልወለድምን ከመጻፌ በፊትና ከርሱ መቃጠል ቤላ እስካለፉት ጥቂት ወራት ድረስ የደረሰብኝን ሥቃይ ሁሉ ለመጻፍ ብሞክር ራሱ ከአልወለድም ዕጥፍ የሆነ መጽሐፍ ስለሚወጣው በዚህ ለመዘርዘር ቦታ የለኝም ። ነገር ግን ከመጽሐፉ ጋር ዝምድና ያለውን አንዳንድ ችግር ብገልጸው ተገቢና አስፈላጊ ይመስለኛል ።